هەزاران دەروێش بە شێوەی نایاسایی هاتنە خاکی هەرێمی کوردستان

هەزاران دەروێش بە شێوەی نایاسایی هاتنە خاکی هەرێمی کوردستان
ڕۆژی پێنجشەممە، ١٩ی پووشپەڕ، هەزاران دەروێشی تەریقەی قادری کە ژمارەیان نزیکەی ٢٠٠٠ کەس مەزندە دەکرێت، بە تەور، خەنجەر و شمشێرەوە، بە شێوەی نایاسایی و بەبێ پشکنینی کۆرۆنا و پاسپۆرت، لە سنووری باشماخەوە هاتوونەتە خاکی هەرێمی کوردستان و دەیانەوێت بەشداری لە پرسەی شێخ محەممەد کەسنەزانی، ڕێبەری تەریقەتی قادری لە شاری سلێمانی بکەن.
بەرپرسێکی دەروازەی نێودەوڵەتیی باشماخ بە تۆڕی میدیایی ڕووداوی ڕاگەیاندووە: ئەم دەروێشانە لە کاتی پەڕینەوە لە سنوور لەگەڵ هێزەکانی کۆماری ئیسلامی تووشی تێکهەڵچوون بوون و  شەش کەسیان، بە تەقەی هێزە چەکدارەکانی کۆماری ئیسلامی بریندار کراون.
لە کاردانەوە بەو هەڵسووکەوتی دەروێشانی تەریقەی قادری، وەزارەتی تەندروستیی هەرێمی کوردستان، نیگەرانی خۆی لەمبارەیەوە دەربڕیوە و ڕایگەیاندووە: ئەگەر پشکنینی کۆرۆنا بۆ ئەم کەسانە نەکرێت لەوانەیە پاش دوو هەفتە کارەساتی گەورە ڕووبدات.
لە درێژەی کاردانەوەکان بەم ڕووداوە، قوباد تاڵەبانی بڕیاری داخستنی خاڵی سنووری پاشماخی دەرکردووە و داوای ڕاگرتنی هاتووچووە بازرگانییەکانی کردووە.
جێی ئاماژەیە، لەم کاتەدا کە پەتای کۆرۆنا مەترسییەکی گەورەی بۆ کۆمەڵگای مرۆڤایەتی دروست کردووە و ئێران یەکێک لەو وڵاتانەیە کە زۆرترین تووشبووی کۆرۆنای هەیە، هەڵسووکەوتی ئەم دەرویشانە و پابەندنەبوونیان بە ڕێنماییە تەندروستییەکان، مەترسی بۆسەر خەڵکی هەرێمی کوردستان زیاتر دەکات، کۆماری ئیسلامیش لەجیاتی پێشگرتنی یاسایی و ئاگادارکردنەوەیان لە مەترسییەکانی ڤایرۆسی کۆرۆنا، تەنیا لە بنکەکانی سەر سنوورەوە تەقەی لێکردوون.

ئه‌م بابه‌ته 223 جار خوێنراوه‌ته‌وه‌‌


AM:03:11:10/07/2020