خۆپیشاندان و مانگرتنی کرێکارانی هەفت تەپە، پێی نایە ١٦ هەمین رۆژی خۆیەوە


رۆژی سێ شەممە ٢٩ی خەزەڵوەر ، مانگرتن و خۆپیشاندانی کرێکارانی هەفت تەپە پێی نایە ١٦ هەمین رۆژی خۆیەوە. لە ١٦ هەمین رۆژی ناڕەزایەتی دەربڕینی کرێکارانی هەفت تەپە. کرێکارەکان سەرەڕای دەستگیرکردن و هەڕەشەکردن وەک ١٥ رۆژی پێشتر لە شاری شووش دەستیان دایە خۆپیشاندان.

کرێکارانی وێڕای ناڕەزایەتی دەربڕین بە لەبەرچاو نەگرتنی خواستەکانیان ، خوازیاری ئازاد کردنی کرێکارانی دەستگیر کراو بوون. جێگەی ئاماژەیە رۆژی یەکشەممە ٢٧ی خەزەڵوەر ١٨ کرێکاری ئەم ناوەندە کرێکارییە لە لایەن هێزە ئەمنیەتییەکانەوە دەستگیر کران و رۆژی دواتر ١٢ کەس لەو کرێکارانە بە دانانی بارمتە ئازاد کران. هەروەها هەڕەشەیان لێکراوە کە نابێ بەردەوام بن لە مانگرتن و خۆپیشاندان.

کرێکارانی نەیشەکەری هەفت تەپە رۆژی سێ شەممە ٢٩ی خەزەڵوەر لە ناو شاری شووش کۆبوونەوەی ناڕەزایەتیان رێک خست و خوازیاری ئازاد کردنی هاوکارەکانیان بوون.

لە ئێستەدا ٦ کرێکاری ئەم ناوەندە پیشەسازییە لەوانە : ئیسماعیل بەخشی، موسلم ئارمەند، محەممەد حەنیفەر ، سەید حسەین فازڵی دەستبەسەرن و تا ئێستە ئازاد نەکراون.

مانگرتنی کرێکارانی هەفت تەپە رۆژی ١٣ی خەزەڵوەر بە ناڕەزایەتی بە نەدانی حەقدەستەکانیان و سپاردنی ئەم ناوەندە بە کەرتی تایبەت و لەبەرچاونەگرتنی خواستە پیشەییەکانی کرێکاران دەستی پێکرد.

سەرەڕای سەرکوت کردن و گوشاری ناوەندە ئەمنیەتییەکان بەڵام کرێکارەکان خوازیاری گەیشتن بە مافەکانیانن.

لە چەند ساڵی رابردوودا، هەفت تەپە وەک ناوەندێکی پیشەسازی چەندین جار ناڕەزایەتی و خۆپیشاندانی کرێکارانی بەخۆوە دیوەو ئەتوانین ئەم ناوەندە بە یەکێک لەو ناوەندانە بزانین کە کرێکاران سەرەڕای هەموو گوشارە حکوومەتیەکان بەڵام تێیدا رێکخراون و سەرەڕای گوشارەکان هەوڵ دەدەن بە مافەکانی خۆیان بگەن.


PM:12:05:20/11/2018




ئه‌م بابه‌ته 461 جار خوێنراوه‌ته‌وه‌‌