ڕێبەری حیزبی کۆمۆنیستی ئێران لە ژێر ھژموونی ڕەوتی کۆمۆنیزمی کرێکاریدان!


ڕە‌فێق حسێن‌په‌ناهی 


لەم ماوەیەدا بۆ جارێكیتر رێبەری حیزبی كومۆنیستی ئێران لە ژێر هێژەمۆنی رەوتە لەت و پەتەكانی كۆمۆنیزمی كرێكاریدا بە شێوەیەكی شڵەژاو، بە ناڕەوا بەرۆكیان بە كۆمەڵە گرتەوە و بە هەموو هێز و توانایانەوە بە كەڵك وەرگرتن لە هەموو ئامرازێكی تەبلێغی لە دژی ئێمە وەستانەوە. ئەم شێوازە لە پڕووپاگەندە و هەڵچوون و جنێو فرۆشیانە وەرگیراو لە ناوەرۆك و شێوەی بەرخوردی تاقمی مەنسووری حیكەمەتە ، هەر لە جۆری ناودێر كردنی ئێمەوە، هەتا بەر چەسپ لێدانی ناڕاست و دڵخۆازانەی ناسیونالیست وهتد.. شەسخی كردنی ناكۆكیەكان، سەرەنج نەدان و بێدەنگی كردن لە ئاست باسە سیاسیەكانی ئێمە و بەرنامە و پرۆگرام و كارنامە و گەشەی كۆمەڵە پاش 18 ساڵ لە هاتنە دەرەوەمان لە حیزبی كومۆنیست ، بە جنێوفرۆشی و نفرەت پژاندن و بڵاو كردنەوەی شایعەی بێ بنەما و بە دوور لە راستی. هەموو ئەمانە خۆ دزینەوە و خۆ لادانە لە باسێكی واقعی و درووست. ئەوان بەم شێوازە لە هەڵسوكەوت و پڕووپاگەندە دەیانەوەێ خۆڵ لە چاوی خەڵكی كوردستان بكەن و بەمجۆرە بۆ ماوەیەكی دیكە حیزبە پڕ كێشە و گرفتە فكری و سیاسی و تەشكیلاتیەكانیان بشارنەوە ، رێبەری حیزبی كومۆنیستی ئێران و تاقمی مەنسووری حیكمەت دەزانن كەشی ئارام و فەزای سالم و سیاسی و دیالۆگ و مشت ومڕی فكری و نەزەری لە بەرژەوەندی ئەواندا نییە و قازانجی ئەوان لە پێكهێنانی فەزایەكی هیستریك و فاڵانژی و شەڕئەنگیزانەیە بۆ راگرتن و مەودادانە بە تەمەنی حیزبە فەوتاوە و بێ كەڵكەكیانە .

رێبەری حیزبی كومۆنیستی ئێران لە پڕووپاگەندەی شیفاهی و نووسراوەی سەر تۆڕە كۆمەڵایەتیەكاندا تەنانەت لە ڕەواڵەت و باس كردندا تۆزێك دەستكاریان نەكردووە تاكوو سەفی ئەوان و تاقمی تا سەر ئێسقان دژە كۆمەڵە لە یەك جیا بكاتەوە .  ئەوان لە ژێر هێژەمۆنی رەوتی كۆمۆنیزمی كرێكاریدا چەقیون و بە تەواوەتی لێك ئاڵاون ، دەستەوملانی ئەو رەوتە بوون كە رێبەری حیزبی كومۆنیستی ئێران كاتی خۆی بێ بەری نەبوون لەو جنێۆ فرۆشی و فاڵانژی هەڵكووتانە سەر كۆمەڵە ، ئەوەی ئێستا دەكرێ و ئەم شەڕە ناسیاسی و ناتەندروست و هەرچی پەرچیە لە مێژووی كۆمەڵەدا نامۆ و بێ وێنە بووە تەنانەت لە كاتی شەڕی ناوخۆی حیزبی دیموكرات لە گەڵ كۆمەڵە قەد كۆمەڵە بەو شێوازە لە دژی بەرامبەرەكەی پڕووپاگەندەی نەكردووە و بەوجۆرە ئەدەبیاتە لۆمپانە لە گەڵ حیزبێك كە لە شەڕدا بوو لە گەڵی بەرخوردی نەكردووە، ئەم جۆرە پڕووپاگەندەی حیزبی كومۆنیستی ئێران زیاتر لە هەموو شتێك نیشانەی بە كەم گرتنی شعور و تێگەیشتنی خەڵكی كوردستانە و بەمجۆرە دەچێتە خانەی سوكایەتی پێكردن بە بزووتنەوەیەك كە 40 ساڵە پاكانە خەبات دەكات بۆ گەیشتن بە مافەكانی گەلی كورد و چینی هەژار و فەقیر و چەوساوەی كوردستان .

 ئەم سیاسەتە و شێوەكارە لە هەمانحاڵدا نیشانەی هاتنە خوار و نزم بوونی ئاستی سیاسی و ئەخلاقی رێبەرایەتی حیزبی كومۆنیستی ئێرانە. پەنا بردن بۆ جنێۆ فرۆشی و نەفرەت پژاندنی شەخسی و سازكردن و بڵاو كردنەوەی دەنگۆ و شایعەی بێ پایە وبناغە وەك ئامرازێكی سیاسی ،دەتوانێ هەندێك كەس دنە بدات و دەمارگرژ و دوژمن سفەت باریان بێنێ ، دەتوانی فاڵانژی بخۆڵقێنێ و بەمجۆرەش كەسانێك بە دەوری رێكخراوێكەوە راگرێ كە رۆژ لە گەڵ رۆژ زیاتر دەلیلی بوونی خۆی لە دەست دەدا، بەڵام ناتوانێ وشیاری بخۆڵقێنێ ، دەتوانێ پیلانگێڕی ببزوێنێ و بیكاتە باو، بەڵام ناتوانی شۆڕشگێڕی بخۆڵقێنێ، دەتوانێ رق  و قین و بۆغزی بێ مەنتق و شەڕەنگێزی پەرە پێبدا، بەڵام ناتوانی بیركردنەوەی مەنتقی و سیاسی بە كاربێنێ و بیكاتە بنەما.

بێ شك ئاكامە زیانبارەكانی ئەم شێوازە زیاتر لە هەموو كەس داوێنی خودی رەوتی حیزبی كومۆنیستی ئێرانی گرتووە و دەگرێتەوە. بە گرتنە بەری ئەم شێوەكارانە ، رێبەرانی حیزبی كومۆنیستی ئێران نە تەنیا ریزەكانی خۆیان لە مەجالی بیركردنەوە لە ناوەڕۆكی راستەقینەی باسە سیاسی و جیاوازە فكرییەكانی ئێمە و ئەوان بێ بەش دەكەن بەڵكوو لەو ساڵانەدا و لە پرۆسەی جیابوونەوەی كۆمەڵە لە حیزبی كومۆنیستی ئێران ئاستی كلتووری تەشكیلاتەكانیان هێناوەتە خوارەوە و هیچ بایەخێكیان بۆ ریزەكانی خۆیان و ئەو ئینسانانەی كە دڵپاكانە بە هۆی خوشناوی و خوشەویستی كۆمەڵەوە روویان تێدەكەن نەداوەو و لە راستیدا لە رۆحی شۆڕشگێڕی دایان دەماڵن و دەیانكەن بە كۆیلە و خواست و هەستیان پێ شێل دەكەن . لە ماوەی ئەو ساڵانەدا لە هیچ شایعە و درۆ و بۆختانێك خۆیان - لە راستێدا رێبەی ئەو حیزبە بۆ خۆیان دەزانن چەندە ناراست و ناڕەوایانەیە – نەپاراستووە و بەم جۆرە بایەخی شۆڕشگێڕانەیان لە خۆیاندا مراند و ئەو نەریتە پاك و سادقانەی كۆمەڵەیان كەم رەنگ كرد و لە خۆیانیان داماڵاند.  لە راستیدا ئەمە ئەركێكی لە مێژینەی رەوتی كومۆنیزمی كرێكاری بوو كە پاش رۆیشتنیان ویستیان ئەم دەردە تووشی كۆمەڵە بكەن و حیزبی خۆشناو و جێ متمانەی گەلی كورد خەوشەدار بكەن . لە راستیدا ئەم وێكچوونە و گرتنە بەری ئەم شێوازە لە نێوان حیزبی كومۆنیستی ئێران و رەوتە لەت وپەتەكانی كومۆنیزمی كرێكاری بە تەنیا هەڵناگەڕێتەوە بۆ شێوازی پڕووپاگەندەیان بەڵكوو پێكهاتەیەك لە روانگە و سیاسەتەكان لە خۆ دەگرێ كە بە بڕوای من دوو هۆكاری هەیە : 

یەکەم:  نەبوونی لێكدانەوەیەكی رۆشن لە سەر رەوتی كۆمۆنیزمی كرێكاری و خۆ جیانەكردنەوەیكی فیكری و سیاسییە لە گەڵ ئەم رەوتە ، كە بەشێكی بەرچاوی رێبەری حیزبی كۆمنیستی ئێران نزیكایەتیكی فكری و سیاسی پتەویان لە گەڵ رەوتی كۆمۆنیزمی كرێكاریدا هەیە و لە زۆر تاكتیك و هەڵوێستیاندا لە بەرامبەر رووداوەكانی ناوچەكە وەكوو یەك تەشكیلات عەمەڵ دەكەن . و لە ماوەی ساڵانی رابردوودا رێبەری حیزبی كومۆنیستی ئێران لە بەرامبەر ئەو هێرشانەی كە رەوتی كۆمۆنیزمی كرێكاری بۆ سەر كۆمەڵەی دەكەن خۆیان لێ گێل كردووە تا ئەو رادەیە وەكوو ئەوە وایە كە رەوتی كۆمۆنیزمی كرێكاری قسەی دڵی بەشێك لە رێبەری حیزبی كومۆنیست دەكەن .

دووهەم:  نزیكایەتی رێبەرایەتی حیزبی كومۆنیست لە گەڵ رەوتی كۆمۆنیزمی كرێكاری دژایەتی هاوبەشیانە لە گەڵ كۆمەڵەیە و بەو پێیەش دژایەتی ئێمە « قازانجێكە « كە رێبەرایەتی حیزبی كومۆنیست دەیكا؛ هەر بۆیە تا ئەو ڕادەیە لە دژی كۆمەڵە هاوبەشانە دەوەستن كە تەنانەت حازر نین جیاوازیە فیكریەكانی خۆیان لە گەڵ رەوتی كۆمۆنیزمی كرێكاری نیشان بدەن.  بەڵام پرسیار ئەوەیە  ئەوەیە بەشێك لە رێبەری حیزبی كومۆنیست كە هێشتاكە لە ژێر ناوی كۆمەڵەدا خەبات دەكەن چ هەڵویستێك دەگرن و چلۆن خۆیان لە گێژاوە رزگار دەكەن ؟ بە تایبەتی ئێستاكە كە كێشە و گرفتەكانی حیزبی كومۆنیست گەیشتووەتە ئاستی تەقینەوە، بە راستی ئەو كەسانەی كە لە ژێر ناوی كۆمەڵەدا لە قەفەسی ژەنگ گرتووەی حیزبی كومۆنیستن دەیانەوێ ریزی خۆیان و سنووری خۆیان لە گەڵ ئەم شانتاژە ژەهراوییە كە لە دژی كۆمەڵە رێكخراوە جیا بكەنەوە یان ئەوانیش لە ژێر ئەم هێژەمۆنییەدا كز و كڕ كەوتوون ؟ كۆمەڵەی شۆڕشگێڕی زەحمەتكێشانی كوردستانی ئێران پاش هاتنە دەری لە حیزبی كومۆنیست لە چەندین قۆناغی جیا جیادا تێكۆشا بۆ ئەوەی سەهۆڵی نێوان كۆمەڵەی شۆڕشگێڕ و رێكخراوی كوردستانی حیزبی كومنیستی ئێران ( كۆمەڵە ) بتوێنێتەوە، ئەم هەوڵەشی بۆ سازكردنی كەشێكی سیاسی و خۆڵقاندنی فەزایكی ئارام و ژینگەیكی تەندروست لە نێو ماڵی كوردستان بوو . هەر لەم پەیوەندەدا و بە مەبەستی کردنەوەی کەش و هەوایەکی سیاسی و دروستبوونی دیالۆگی سیاسی لە نێوان دوو لایەندا،  چەند ساڵ پێش سكرتێری گشتی كۆمەڵە هاورێ عەبدۆڵا موهتەدی نامەیەكی سەرئاواڵەی بڵاو كردەوە و بە نوێنەرایەتی كۆمەڵەی شۆڕشگێر داوای هاوكاری و ئاسایی كردنەوەی نێوان هەر دوو لای کرد. لەو نامەیەدا هاوڕێ عەبدوڵڵا موهتەدی دەڵێت:»  با لە سەر خاڵە هاوبەشەكانمان دانیشین و لە زۆر بواردا هاوكاری و پێوەندی نێوانمان سەرەڕای هەموو جیاوازیە فیكری و سیاسیەكانمان هاوكاری بكەین .»  

بە داخەوە ئەم نییەت پاكیەی رێبەری كۆمەڵەی شۆڕشگێڕ بە هەند وەر نەگیرا و بێ ئاكام مایەوە ، لەم رووداوانەی ئەم ماوەیەدا بە كاری هاوبەشی رێبەری حیزبی كومۆنیستی ئێران لە گەڵ رەوتی كۆمۆنیزمی كرێكاری وا دەركەوت و دەردەكەوێ كە رێبەری حیزبی كومنیست خەتی فیكری رەوتە شپرز و لەت و پەتەكانی كۆمۆنیزمی كرێكاریان بە باش زانی بۆ هاوكاری یان بە واتایەكی دیكە تازە هەست دەكەن كە تیۆریە ئاشبەتاڵەكەی مەنسووری حیكمەتیان درووست بووە و پەشیمانن لەوەی كە ساڵانێك رەوتی كۆمۆنیزمی كرێكاریان بە خائین و خەیانەتكار دەزانی .  ئەم كەش و هەوایەی ئەم ماوەیە كە ناحەق رێكخرا ئەو راستییەی دەرخست كە رێبەری حیزبی كومۆنیستی ئێران خۆی یەكلایی كردۆتەوە و بە تەواو مانا خزاوەتە بەرەی رەوتی كۆمۆنیزمی كرێكاری و باڵەكانی و دەرباز بوونیان لە ژێر ئەم هێژەمۆنییەدا ئەستەمە.  ئەو ئینسانانەی كە هێشتا بە خۆشەویستی كۆمەڵەوە لە گەڵ رێبەری حیزبی كومۆنیستدا ماونەتەوە كاتی ئەوە هاتووە كە ئەم راستییە بزانن كە كۆمەڵە و بزووتنەوەی شۆڕشگێڕانەی گەلی كورد هێشتا لە سەر پێیە و رۆژ لە گەڵ رۆژ روو لە گەشەیە و گوێ ناگری لەوانەی كە تاوانباری مێژوون و قەزاوەت لە سەر مێژوو دەكەن .



PM:01:33:06/02/2019




ئه‌م بابه‌ته 241 جار خوێنراوه‌ته‌وه‌‌