کرێکار هیچی نییە بۆ دەست دان، زنجیرەکانی دەستی نەبێ (کارێل مارکس)

مێژووی ڕۆژی جیهانی کرێکار ئەگەڕێتەوە بۆ 1مەی ساڵی1886ی زایینی کە کرێکارانی ئەمریکایی بۆ یەکەم جار خۆپیشاندانێکی گەورەیان ڕێکخست و خوازیاری ئەوە بوون کە سەعاتی کاریی ڕۆژانەی کرێکار لە14سەعاتەوە بۆ 8 سەعات کەم بکەنەوە کە ئەو یاسایە ئێستاش لە زۆربەی وڵاتانی سۆسیال دێموکرات خراوەتە بواری جێبەجێ کردن و کاری پێ دەکرێت؛ دەیان ساڵە ئەو بۆنەیە لەوڵاتانی جۆراوجۆر بەشێوەی ئاکسیۆن و خۆپیشاندان و ناڕەزایەتی بۆ دەستەبەرکردنی مافی کرێکاران و داخوازییە سینفییەکانیان وەک: حەقدەست، بیمە، ئەمنیەتی کار و سەعاتی کاری، بەڕێوە دەچیت.

کۆمەڵە لە سەرتای دامەزرانی وەک ڕەوتێکی فیکری چەپ و سۆسیالیست لە کوردستانی ڕۆژهەڵات کە لەوڵامی پێویستییەکی مێژوویی توێژێک لە کۆمەڵگای کوردستان دامەزرا و هەڵقوڵاوی ماف و داخوازییەکانی کرێکاران و زەحمەتکێشان بوو، هەمیشە بەشێوەی کرداری خاوەنداری لە یەکی ئەیار و مافە ڕەوا و بەرحەقەکانی کرێکاران و زەحمەتکێشان، وەک تویژی بێبەشی کۆمەڵگای کوردستان کردووە؛ ڕێبەرانی ئەو ڕەوتە لە کورەخانەکان و مەزراکاندا چوونە ناو خەڵکی هەژار زەحمەتکێش و شان بەشانی ئەوان کاریان ئەکرد و هەموو ئازار و زەحمەتی ئەو خەڵکە هەژارەیان ڕاستەوخۆ هەست پێ دەکرد و تا ئێستاش کۆمەڵە بەردەوامە لە سەرخستنی خەباتی چینایەتی و ئەویشە بەدیهاتنی مافی ڕەوای کرێکاران و زەحمەت کێشان.

کاتێک کە شۆڕشی گەلانی ئێران لە ڕێبەندانی 1357ی هەتاوی سەری هەڵدا کۆمەڵە وەکوو حیزبێکی یەکسانیخواز و خوازایاری عەداڵەتی کۆمەڵایەتی و ژیانێکی شایستە بۆ کرێکاران، بەشداری چالاکانەی کرد و نوێنەری ڕاستەقینەی هەژاران و زەحمەتکێشان بوو. سەدان نموونەی بەرچاو لە جەسارەت و گیانبازی و خزمەتی پێشمەرگەی کۆمەڵە هەیە کە ئێستاش لە بیرەوەری خەڵکی کوردستان دا ماوەتەوە. پێشمەرگەی کۆمەڵە بەو فەرهەنگە سیاسیە پەروەردە کرابوو ئەگەر ڕوویان لەهەر ناوچە و شوێنێک کردبوایە شان بەشانی ئەو خەڵکە هەژار و زەحمەتکێشە کاریان ئەکرد و یارمەتیان ئەدان وە ئەویشە خۆشەویستی کۆمەڵەی لەناو کۆمەڵانی خەڵک زیاتر و زیاتر کرد.

لە ئێستادا کە کۆماری ئیسلامی بەهۆی پشتیوانی لە تیرۆریزم و پەرەپێدان بەعەقڵییەتی توندڕەوی لە ناوچەکە کەوتۆتە بەر سزا نێودەوڵەتیەکان و تەنانەت تاوانی زیادەڕەوی و سەرەڕۆییەکانی لە ناوچەکە، بە پاساوی گەمار و ئابڵۆقە خستۆتە سەرشانی کۆمەڵانی خەڵک؛ وەک ئەبینین ڕۆژانە شاهیدی دەنگی ناڕەزایەتی کرێکاران و فەرهەنگیان و هەموو توێژێکی کۆمەڵگای ئێران و کوردستان هەین، کەهەر جارە و بەبیانووی دەستێوەردانی دەرەکی لەلایەن ڕژیمەوە سەرکوت دەکرێت، تەنانەت لە ناوچە مەرزنشینەکان کە ڕۆژانە شایەدی کوژرانی کۆڵبەران و کاسبکارانی سووتەمەنی لەناوچە پەراوێزخراوەکانی ئێران(کوردستان و بەلووچستان و خوزستان)، هەین کە ڕاستەوخۆ بەتەقەی هێزە چەکدارەکانی کۆماری ئیسلامی دەکرێنە ئامانج و گیانیان بەخت دەکەن.

کۆمەڵە وەک ئەرکێکی مێژوویی، خۆی بە بەرپرسیار زانیوە کە داکۆکی و پشتیوانی لە تویژی هەژار و کەم داهاتی کۆمەڵگای کوردستان بکات و خۆی بە داکۆکیکاری ڕاستەقینەی خەباتی کرێکاران دەزانێت و پێی وایە: هۆکاری هەموو نەهامەتییەکانی چینی کرێکار و سەرجەم چین و توێژەکانی دیکەی کۆمەڵگای ئێران، ڕژیمی کۆنەپەرەستی کۆماری ئیسلامییە، بۆیە پێویستە کرێکاران بە یەکگرتووییەکی زیاترەوە هاوتەریب لەگەڵ بزووتنەوە کۆمەڵایەتییەکانی دیکە خەبات بە دژی کۆماری ئیسلامی بکەنە ئەولەوییەتی خەباتیان و بێ گومان گەیشتن بە مافەکانیان، بە نەمانی کۆماری ئیسلامی و بونیاتنانی دێمۆکراسی و عەداڵەتی کۆمەڵایەتی دێتە دی.

ئه‌م بابه‌ته 503 جار خوێنراوه‌ته‌وه‌‌