رۆژی رابردوو لە خۆپیشاندانە جەماوەرییەکەی برلین لە وڵات ئاڵمان، وێنەیەک بڵاو بوەتەوە کە کوردێک ئاڵای شێروخۆرشیدی خستوەتە ژێ پێ و خەڵکانێک بە شانازیەوە باسی ئەوە دەکەن کە ئەمە کارێکی باشەو دەبێ ئێمەی کورد لەسەر ئەم ڕێچکەیە بڕۆینە پێش و هەمو هێماکانی نەتەوەکانی دیکەیش بخەینە ژێر پێمانەوە بۆ ئەوەی کورد بگات بە ئامانجی خۆی.
بەشێکی دیکەیش بەدیدێکی رەخنەگرانەوە سەیریان کرد کە منیش لێرەدا لەتوێژی دوهەمم و پێم وایە ئەمە کارێکی باش نییەو دەبێ تێڕوانینمان جۆرێکی دیکە بێت. کورد دەیان ساڵە داوای دیمۆکراسی و مافی میللەتان دەکات و ئەوەی بۆ خۆی داوای کردووە بۆ میللەتانی دیکەی ناو ئێرانیش هەمان داوای کردووە. لە دروشمی خودموختاری بۆ کوردستان و دیمۆکراسی بۆ ئێرانەوە بگرە تا ئێستا کە ناوەندی هاوکاری داوای فێدرالیزم بۆ داهاتووی ئێران دەکات.
کورد خۆی قوربانی هەمان فاشیزم و نەبوونی دیمۆکراسیە، قوربانی کلتووری یەکتر قەبووڵ نەکردنە، ئەوەی لەنەبوونی دیمۆکراسی و پلۆرالیزمدا قوربانی بووە ئێمەی کورد بووین لە پلەی یەکەمدا، ئەوەی تووشی کارەسات بووە لەم پڕۆسەو ئەم بۆچوونە هزریەدا خودی ئێمەی کورد بووین.
ئەگەر ئێمە نەتەوەیەکی دیمۆکراتین دەبێ لە چوارچێوەی درووشم بێینەدەرۆ و بە کردەوە بیسەلمێنین کە ئێمەین دایکی دیمۆکراسی لە ئێراندا، ئێمەین خەباتمان بۆ کردووە، ئێمەیش دەبێ بەو ڕێچکەیەدا هەنگاوی زیاتری بۆ هەڵبگرین. هەموومان لە کۆنەوە هەستمان بە بوونی ئەو جۆرە فاشیزمە کردووە کەلە ژێر ئەو ئاڵایەدا لە دژمان زوڵم و زۆر، چەوساندنەوە ،بێ ڕێزی و ئاسیمیلەی سیاسی، کلتووری، ئابووری و کۆمەڵایەتی کراوین و لاپەڕەکانی مێژو پڕن لەوانە.
بەڵام دۆخ دۆخێکی دیکەیە سەردەمی جیهانی گلۆبال و ئینفۆرمەیشێنە کە ئێمە زیاتړ دەتوانین تێیدا مەلە بکەین. ژینا ئەگەر بیست ساڵ پێش بکوژرایەت کەس نەیدەزانی و لە چوارچێوەی بنەماڵە ، گەڕەک، خێڵ و ئوپەڕی شاریخۆی بەبێ دەنگی قەتیس دەما.
کورد ئێستا ناسراوتر، چاوکراوەتر، باسەوادترە و دەبێ لەم پوتانسێڵەی خۆی و جیهانی سەردەم کەڵکی خۆی وەربگرێت. ئێمەی کورد چ بمانەوێ و نەمانەوێ ئێستا بەشێکی زۆر لە حەشیمەتی فارس، تۄرک و ئازەری ئاڵای شێرو خۆرشیدیان پێ ئاڵای خۆیانە، چۆن ئێمە بێ ڕێزی بە ئاڵای کوردستان بکرێ خوێنمان دێتە جۆش ئەوانیش وەک ئێمە وان و بگرە تووندتر لە ئێمەیش دژ کردەوە نیشان بدەن لە دەروونی خۆیاندا.
چۆن لە ئەمریکا 50ئاڵا بە نوێنەرایەتی 50ئەیالەت هەیە لە ئاڵمانیش بەهەمان شێوە و باقی وڵاتانی دیکەیش لە ئێرانی داهاتویشدا ئێمە دەبێ ئاڵای حکومەتی ناوەندیش لەپاڵ ئاڵای کوردستان هەڵبکەین و قەبوڵی بکەین. یەک لەبنەماکانی ئەو دیمۆکراسییەی کورد داوای دەکات یەکنر قەبووڵکردنە لە هەموو رویەکەوە چ وەک ئەندێشەو و بۆچوون و ئایدۆلۆژیە جیاوازەکان بەهەمو هێماکانیانەوە کە خۆی لە ئاڵاو دروشمدا دەبینێتەوە. ئەوەی ئەم کوڕە کوردە کردی خۆی لە بنەڕەتدا پێشێلکردنی دیمۆکراسیە و لە جیهانی سیاسەت و خەباتێکی لۆژیکی نە جێگای هەیە و نە قابیلی قەبووڵ.
کورد لە داهاتووی ئێراندا دەبێ بەشداری سیاسی و شەریکی سیاسی بێت لە ساحەی سیاسی ئێراندا  نەک چاودێری سیاسی و لە دوورەوە سەیری رەوتی رووداوەکان بکات و جارێکی دیکە سیناریۆی 57 دوپات بێتەوە بۆمان. کە بەشداری سیاسی و شەریکی سیاسی بوویت دەبێ هەردو لا هەڵگری کلتووری پێکەوەبوون، یەکتر قەبووڵکردن، ئاشتیخواز بوون و لە هەمان کاتیشدا شەڕی چەکداری و گەرمی شاخ و شەقامەکانی کوردستان بگۆڕین بۆ خەباتی دیمۆکراسی، خەباتی پەرلەمانی و چارەنووسی سیاسی کورد لە هۆڵی کۆبوونەوەکان و جیهانی دیپڵۆماسی چارەسەر بکەین.
فاشیزم نە لە ئاڵمان نە لە ئیتالیا و نە لە ئێرانیش بێجگە لە ماڵوێرانی هیچی دیکەی بەدواوە نەبووەو لە داهاتویشدا نایبێت. کورد نابێ بکەوێتە دوای و داوی سیاسەتی رژیم کە سەردەبڕین، چاو کوێر دەکەین و مرۆڤێکی بێ رەحمین، خۆیان بکەر و کارئەکتەری وەها جینایەتێکن و بە درێژایی 43 ساڵ و لەم رۆژانەیشدا زیاترهەست بەو تایبەتمەندیە‌ پڕ لە جینایەت و تاوانانەی رژیممان کردووە.
کەوایە دەبێ ئێمەی کورد شکڵ و شێوازی خەبات، میکانیزم و چۆنیەتی هەنگاو نان بۆ داهاتوویەکی گەش کە هەموومان وەک خەونێکی هەمیشەیی داوای دەکەین ڕێگاکانی بدۆزینەوە و دوور بکەوینەوە لە هەرچەشنە بەرچاو تەنگی و دەمار گرژییەک کە خزمەتمان پێ ناکات.

ئه‌م بابه‌ته 281 جار خوێنراوه‌ته‌وه‌‌